Llibros

Frank Quasar debuta cola novela «Los lobos de la luna»

El martes 5 de xunu salió a la venta «Los lobos de la luna», primer novela de Frank Quasar, seudónimu d’un escritor xixonés que quier caltenese nel anonimatu. Editada por Vision Net, una editorial independiente asitiada en Madrid, «Los lobos de la luna» ye una novela d’acción, suspense y terror con delles pincelaes d’humor negro. Una hestoria sorprendente, llena d’intriga y xiros argumentales, con un desenllaz qu’aguanta la emoción hasta l’últimu momentu.

La trama arrinca al atopar el cadabre d’una moza nun basureru abandonáu. Inmediatamente, aparecen n’escena dos detectives de caracteres antagónicos, lo que fai que’l relatu asemeye al principiu una hestoria policiaca convencional onde la investigación forense y les deducciones serán el platu fuerte de la progresión narrativa. Pero de secute, salta delantre del llector Rita Carrera, la verdadera protagonista de la novela, una periodista guapa y importosa que, a partir d’esi momentu, va monopolizar los momentos más brillantes de la intriga texida por Frank Quasar.

Fieres asesines, personaxes extraños y fascinantes, un ambiente seique futurista, crímenes brutales, carreres, persecuciones, pandilleros violentos fascinaos pola lluna llena. «Los llobos de la lluna» ye una hestoria complexa con un final nada complaciente col llector. Frank Quasar escribe una novela onde nada ye lo qu’aparenta y cada personaxe muévese por razones escur. La narración ta contada nun estilu directu, ensin adornos lliterarios, que pon l’énfasis na hestoria y los diálogos y llimita la descripción a lo imprescindible.