Llibros

Muerre Diego Catalán, una figura fundamental na dialectoloxía asturiana

Diego Catalán.

Diego Catalán Menéndez-Pidal, filólogu y folclorista continuador de la obra de so güelu Ramón Menéndez Pidal, morrió’l 9 d’abril pasáu en Madrid a los 80 años d’edá. Foi una figura esencial na dialectoloxía hispánica y, sobre manera, na asturiana. Yera’l responsable de la Fundación Menéndez Pidal, onde ta guardáu tol legáu de Ramón Menéndez Pidal qu’él s’encargó de siguir. Interesáu nel Romanceru, Diego Catalán coordinó’l proyectu Romancero Panhispánico, que quier dixitalizar tolos testos y les sos variantes. Ente les sos últimes producciones hai que destacar la edición nel añu 2005 de la reconstrucción de la «Historia de la lengua española», una obra que Ramón Menéndez Pidal nun pudiere acabar en vida.

En cuantes a la so vinculación con Asturies hai que facer alcordanza de les sos encuestaciones pel oriente d’Asturies a mediaos de los años 40, con Álvaro Galmés de Fuentes, pa estudiar el fenómenu de l’hache aspirada nel asturianu oriental. Con esti mesmu autor publicó en 1989 la obra «Las lenguas circunvecinas del castellano: cuestiones de dialectología hispano-románica», onde partíen de los datos de les encuestes feches n’Asturies por Menéndez Pidal en 1910. La presencia d’Asturies nel romanceru queda patente nos tres volúmenes que publicó la Fundación Menéndez Pidal col nome de «Silva asturiana», dos de Jesús Antonio Cid y otru de Jesús Suárez López.

Diego Catalán collaboró col Seminariu de Filoloxía Asturiana, entidá universitaria qu’entamó’l congresu «100 años de Filoloxía Asturiana (1906-2006)», y formó parte del so comité científicu. La «Revista de Filoloxía Asturiana», publicada pol Seminariu, tamién recoyó un artículu d’él sobre la tradición testual pelaxana. Otra manera, Diego Catalán siempre punxo toles facilidaes pa consultar los fondos de la Fundación Menéndez Pidal. Resultáu d’esa collaboración van ser les obres que’l Seminariu de Filoloxía Asturiana va publicar d’equí a poco: un volume con tola obra de Menéndez Pidal sobre’l dominiu llingüísticu astur-llionés y la encuesta dialectal que fixera nel añu 1911 n’edición preparada y actualizada por Diego Catalán.