Música

Noreña acueye unes «Xornaes de música na cai»

La Conceyalia de Cultura del Conceyu de Noreña entamó, cola collaboración de la Escuela de Música Tradicional, unes Xornaes de Música na Cai col nome de Noreña pola Música d’Asturies. Les actividaes programaes van desarrollase los sábados y vienres (escomenzaron el 23 de mayu y van acabar el 19 de xunu) dende les 13:00 hores nel Quioscu de la Música.

Hasta’l momentu fixéronse monográficos dedicaos a l’asturianada y la gaita. Y ta previsto que nos sábados 6 y 13 de xunu sean los protagonistes los cantares narrativos y la flauta travesera. Asina, el día 6 les actividaes van escomenzar a les 10:30 hores con una alborada con pareyes de gaita y tambor que van percorrer les cais de Noreña, y a les 12:00 hores (na Casa de la Cultura) va facese una charla col títulu de Los Cantares Narrativos n’Asturies, que va tar al cargu d’Héctor Braga, músicu multiinstrumentista y cantante, excomponente del grupu Llangres, Llicenciáu pol Conservatoriu Superior de Música d’Uviéu, animador de mercaos tradicionales y con dos discos en solitario espublizaos. Esi día va dedicase’l conciertu a ufiertar una muestra de cantares narrativos, ente los que van incluise romances, coples de ciegu, monólogos, etc. interpretaos pol propiu Héctor Braga y por Carlos Alba «Cellero».

El sábadu 13 de xunu van continuar les xornaes con otra alborada (tamién a les 10:30 hores) y un conciertu col nome xenéricu de Muestra de flauteros asturianos, nel que van tar presentes Diego Pangua (de Felpeyu) y Pepín de Muñalén (de Tuenda y La Bandina’l Tombo), que van tar acompañaos por Alberto Ablanedo col bouzouki.