Sociedá

Yá ta abiertu’l Muséu de la Memoria

Casona del Bravial de Blimea.

El Muséu de la Memoria inaugurábase la selmana pasada, en Samartín del Rei Aurelio, con unos fondos compuestos por trescientes fotografíes vieyes, cincuenta entrevistes que se grabaron en videu a persones mayores de 65 años y recortes de diarios de los primeros años del sieglu pasáu, como La Aurora Social, El Nalón o La Prensa.

El Muséu comparte espaciu cola Oficina de Normalización Llingüística na Casona del Bravial de Blimea. El Conceyu escoyóla por ser ún de los edificios más vieyos del territoriu (la construcción ta fechada ente los sieglos XIII y XIV). Tolos fondos del equipamientu tán dixitalizaos y pueden consultase na páxina web (www.mumemo.es), lo que permite la posibilidá de conocer los documentos dende cualquier sitiu que tenga un equipu informáticu con conexón a Internet.

L'alcalde de Samartín, Ignacio Fernández, fixo un llamamientu a les aportaciones de los vecinos porque la so collaboración ye mui importante pa que los fondos d'esti «muséu infinitu» medren. «Ye un proyectu ensin fronteres, importante pa los asturianos, los que viven dientro y fuera del país», indicó. L'alcalde sorrayó que la rehabilitación del edificiu empezó hai ocho años. Y añadió que «ye importante documentar la memoria de Samartín». La Oficina de Normalización Llingüística taba enantes na Oficina de la Mocedá. El so treslláu supón una ampliación del horariu, y a partir d'agora va abrir pela mañana y pela tarde.