Sociedá

Xixón acueye la VI Fiesta de les Asociaciones

VI Fiesta de les Asociaciones.

La zona de la playa d’El Natahoyo en Xixón vuelve a acoyer la llamada Fiesta de les Asociaciones qu’entama’l Conseyu de la Mocedá. Ye la sesta edición d’esti eventu que, según comenten los organizadores, «ye una gran plataforma d’espresión llibre pa tresmitir a la ciudadanía tolo que se quiera».

Del xueves 22 hasta’l domingu 25 de xunetu van desenvolvese bien d’actividaes mui distintes ente sí: torneos deportivos (fútbol, balonmano, baloncestu o skate), exhibición de graffiti, charles (sobre los asuntos más diversos, que van de la situación nel Sáhara a la toponimia asturiana), talleres (pa los neños y neñes, de percusión...), cuentacuentos, etcétera.

Aspectu importante d’esta Fiesta de les Asociaciones son los conciertos. Asina, el xueves la nueche van protagonizala los componentes del grupu folk Felpeyu; el vienres, el conciertu va tar dedicáu al hip hop coles rimes de La Güela Dice Crew y Látex Diamond; el sábadu, los encargaos d’animar la xornada van ser los grupos La Tarrancha y Dixebra; y el domingu va echase’l piesllu con una fiesta cubana.