Cultura tradicional

Siguen los Alcuentros cola Cultura Tradicional d’Asturies en Colunga

VI Mercáu Tradicional nos Alcuentros.

Los XV Alcuentros cola Cultura Tradicional d’Asturies, que se tán desenvolviendo en Colunga nestos díes, siguen coles sos actividaes. Asina, el xueves 22 de xunetu ta prevista la celebración del Floréu de música y cancios d’Asturies (Plaza d’España, 20:30 hores), col gaiteru y cantante Xuacu la Miranda y el teclista Mento Hevia. Esti conciertu enmárcase tamién nel III Requexu de la Tonada Asturiana.

Otra manera, el sábadu 24 y el domingu 25 va entamase’l VI Mercáu Tradicional nos Alcuentros (Plaza del Conceyu, a lo llargo de tol día). Va ser el colofón a los Alcuentros d’esti añu y, amás de dellos puestos de venta y esposición de productos artesanos y alimenticios, va contar con talleres en vivo sobre oficios vieyos, xuegos tradicionales, animaciones y actuaciones folclóriques y musicales. Va facese, tamién nel recintu del Mercáu, una esposición d’instrumentos tradicionales y intervenciones en directo con acordión, gaita rabil, flautes, percusión…

El día 24, a les 20:00 hores, va entamase nel Mercáu’l Festival de l’Asociación d’Intérpretes de la Canción Asturiana (AICA), cola intervención de los cantantes de tonada Juan Robledo Iglesias, Laudelina Hortal y Juan Luis García Lobo, acompañaos a la gaita por Francisco José Álvarez. Tamién va tar presente’l teatru, de la mano del grupu La Cruz de Ceares, que va representar la obra El recateo.