Sociedá
El MUXA entama les xornaes «Nueches Xurásiques»
Muséu del Xurásicu d'Asturies (MUXA).
El Muséu del Xurásicu d'Asturies (MUXA) entama del 23 al 26 de xunetu les Nueches Xurásiques. Baxo'l títulu La mio gran boda xurásica, los participantes van poder conocer d'una forma sorprendente y dinámica esti equipamientu con visites tematizaes nocturnes.
Nesta ocasión Pin y Elisenda, dos personaxes divertíos del departamentu científicu del MUXA, van mostrar al públicu el mundu fascinante de los dinosaurios. Amás, Doña Liberta, la xefa d'esti departamentu, va casar nel muséu y tolos visitantes van tar convidaos al festexu que se va facer cuando acabe la visita.
Los pases van facese a les 20:30, 21:45 y 23:00 hores. La entrada xeneral tien un preciu de 8 euros y la reducida, de 6. Les places son contaes, polo que s'aconseya acutales en tiempu nel 902 306 600.
Les Nueches Xurásiques formen parte de ¡Viva les Nueches!, un programa de visites guiaes especiales y nocturnes qu'empezó en Llaboral Ciudá de la Cultura y que va siguir nel MUXA y nel Parque de la Prehistoria de Teberga.
