Música

Navelgas celebra la final del Concursu de Folk «Cuartu los Val.les»

XI Concursu Internacional de Folk «Cuartu los Val.les».

Los próximos díes 23 y 24 de xunetu’l pueblu de Navelgas (Tinéu) va celebrar la final del XI Concursu Internacional de Folk «Cuartu los Val.les», ún de los más prestixosos y con más sonadía del Estáu español. D’ente los 58 trabayos discográficos orixinales o maquetes unviaes dende tola xeografía peninsular, Europa o Suramérica, el xuráu escoyó seis artistes o grupos que van actuar esti vienres y sábadu nesi llugar del occidente asturianu.

Marcela Ferrari (Arxentina), Barrunto Bellota Band (Estremadura) y Plaza & Garmendia (Euskadi) van competir el primer día na sección acutada pa intérpretes solistes, dúos o tríos. Al otru día, van concursar nel apartáu de grandes bandes o grupos folk Pé de Boi (Galicia), La Banda del Pepo (Murcia) y Tazzuf (Barcelona). Toos ellos tienen años d’esperiencia escénica en festivales estatales y tamién d’estudiu, al tener grabaciones dientro de la escena folk, la música tradicional o la fusión.

Un xuráu formáu por especialistes, críticos, músicos o perdiodistes de dellos medios que trabayen cola música tradicional y folk va decidir quién ye merecedor del primer premiu en caúna de les modalidaes. Amás d’en metálico, el premiu consiste nuna pieza conmemorativa del artista asturianu Manolo Linares. Tolos concursantes han grabar tamién dos temes orixinales pal discu dedicáu a esta once edición del concursu, qu’hasta la fecha yá tien editaes les siete primeres.