Música
El Festival Intercélticu d’Avilés llega al final
22-07-2010El vienres 23 de xunetu va clausurase la quince edición del Festival Intercélticu d’Avilés, qu’entamó a lo llargo d’una selmana l’Asociación Cultural Esbardu. Agrupaciones folclóriques, bandes de gaites, solistes y grupos musicales de dellos de los países celtes enllenaron les cais de la ciudá, cola participación de bien d’asistentes en tolos actos entamaos, especialmente nos conciertos y na Aldea Celta (mercáu d’artesanía y gastronomía).
La última de les xornaes va principiar a les 20:30 hores con un desfile per delles cais céntriques, onde van tar presentes delegaciones d’Escocia, Irlanda, Gales, Galicia y Asturies. A les 23:15, na Plaza del Carbayedo va facese la clausura oficial del FIAC 2010, y a les 23:45 va principiar l’últimu de los conciertos previstos, protagonizáu polos escoceses Red Hot Chilli Pipers.
Los Red Hot Chilli Pipers son una formación d’ocho músicos con una puesta n’escena perespecial: vistíos colos kilt (falda) tradicionales del so país, interpreten un repertoriu gayoleru onde’l folk fusiónase col rock y el funk, siempre col aquel de que’l públicu lo pase lo meyor posible. Yá tuvieron n’otres ocasiones nel festival y dexaron mui bon recuerdu.
