Sociedá

Celébrase la última xornada del II Campionatu d’Asturies de Liriu

II Campionatu d’Asturies de Liriu.

El sábadu día 24 de xunetu ponse fin al II Campionatu d'Asturies de Liriu na pista del polideportivu de Piedrasblancas, en Castrillón.L'eventu, organizáu pol equipu decanu del xuegu n'Asturies, Astur Lirio de Las Bárzanas, va consistir, como les anteriores xornades, nuna partida oficial colos cinco equipos del Conceyu Nacional del Liriu (CNL) y un tornéu abiertu a la participación de toos aquellos asistentes que-yos apeteza, valederu pal Campionau d'Asturies de Liriu Individual, en casu de dase los criterios d'homologación. La cita va ser a partir de les 11:00 hores, escomenzando l'abiertu en cuantes acabe la partida por equipos.

Amás, esta fin de selmana, el Conceyu Nacional de Liriu tá invitáu a la Fiesta de les Asociaciones de Xixón, inciativa entamada tolos años pol Conceyu la Mocedá de Xixón. Yá l'añu pasáu'l liriu tuvo representáu pol equipu Espor d'Asturies, nuna demostración. Pero esti añu, el compromisu va ser mayor, pasando a organizase un abiertu, a partir de les 12:00 hores de la mañana del domingu 25, nel paséu de la Playa d’El Natahoyo en Xixón.