Sociedá

Principia’l festival Beltaine n’Avilés

Beltaine. La Fiesta'l Branu.

La segunda edición del festival Beltaine. La Fiesta’l Branu principia’l sábadu 24 de xunetu n’Avilés y va allargase hasta’l domingu día 1 d’agostu. Nesta ocasión van acudir a esti eventu delegaciones d’Asturies, Bretaña, Irlanda, Euskadi, Portugal, Cornualles, Isla de Mann y Galicia.

El programa inclúi actividaes deportives, gastronómiques, culturales y musicales. Los grupos y artistes más importantes d’esta segunda edición del Beltaine van ser la gaitera gallega Susana Seivane, los irlandeses Lúnasa, l’acordionista bretón Thomas Moison, los portugueses Galandun-Galandaina o los asturianos Tejedor, Corquiéu y Felpeyu.

Na primer xornada va facese l’acoyida de les delegaciones, que van animar darréu delles cais de la ciudá. A les 19:00 hores ta previstu un pasacáis y depués van izase les banderes de los países participantes na Plaza Hermanos Orbón (Les Aceñes). A les 20:30 hores na Plaza’l Parche va desenvolvese l’espectáculu Sones de la memoria a cargu de l’agrupación avilesina Escontra’l Raigañu. El primeru de los conciertos va tar protagonizáu por Celtic Caos & Stompers, que van ufiertar l’espectáculu de música y danza irlandesa An Táisteal (El Viaxe) y Lúnasa.

Lúnasa ye una de les formaciones más importantes de la música folk irlandesa, con dellos de los instrumentistes más virtuosos d’aquella isla. Dende la so nacencia, nel añu 1997, nun fixeron otro que collechar les meyores crítiques y xirar per tol mundu cola so propuesta onde la tradición algama niveles d’elegancia más que bultables.