Música

La Tarrancha y Dixebra actúen en Xixón

Dixebra.

El sábadu 24 de xunetu, a partir de les 22:00 hores, nel escenariu asitiáu na playa d’El Natahoyo, van actuar los grupos La Tarrancha y Dixebra. El conciertu va poner fin a la segunda xornada de la Fiesta de les Asociaciones qu’entama anualmente’l Conseyu de la Mocedá de Xixón.

La Tarrancha creóse hai siete años col oxetivu de facer música alredor de los soníos d’orixe xamaicanu (reggae, ska, rocksteady…), a los que depués amestaron otros como’l funk o’l folk. Depués de dellos problemes d’estabilidá y numberosos cambios nos sos componentes, por fin alcontraron una formación afitada. Tienen publicada una maqueta col títulu de Qlt y un discu llamáu Otres tres. El so repertoriu ta formáu mayoritariamente por cantares en llingua asturiana.

Dixebra ye una de les bandes referenciales del rock fechu n’Asturies y lleva n’activo ininterrumpidamente dende l’añu 1987. En tou esti tiempu publicaron diez trabayos discográficos y dieron bien de conciertos n’Asturies y fuera d’ella (mesmamente per dellos países europeos). Nel conciertu van ufiertar un repertoriu onde tienen incidencia especial los temes que formen parte del so últimu discu, Amor incendiariu, qu’aparecía a primeros d’añu.