Cine, teatru y TV

«Night of the living dead» ye’l primer llargumetraxe dobláu al asturianu

Night of the living dead (La nueche de los muertos vivientes) va convertise nel primer llargumetraxe dobláu al asturianu de la historia. La película va estrenase en L’Arribada 2010. La sección «Vagamar» d’esti festival lliterariu va acoyer la so estrena tovía nuna fecha ensin decidir.

Night of the living dead ye una película de 1968 dirixida por George A. Romero, considerada un clásicu del cine universal y que dio orixe al subxéneru de cine de zombis tal como se conoz na actualidá. La trama ye la clásica del xéneru: los muertos vuelven a la vida espardiendo la so mesma condición al traviés de los Estados Uníos y atacando a los vivos p'alimentase de la so carne. Anque foi una película de presupuestu baxu –rodóse en blanco y negro y cinta de 16 mm, dirixóla un director nuevu nel so tiempu, George A. Romero, con un repartu d'actores amateurs, cuando non familiares y amigos del propiu Romero–, el film considérase una obra clásica del cine de terror por munchos críticos y ta nel puestu 93 na llista de los 100 meyores películes americanes del American Filme Institute.

Night of the living dead doblóse al asturianu nel estudiu de grabación CMG y ye un productu de Gonzali Producciones.