Llibros

Aparez un númberu nuevu del boletín «Krasnia»

Krasnia.

Acaba d’aparecer un númberu nuevu del boletín de distribución gratuíta Krasnia, correspondiente al branu del 2010 y que llega con él a los 33 volúmenes editaos.

Nesta ocasión destaca sobre manera un informe estensu sobre la incineración de residuos (fálase de la so problemática y alternatives, amás de lo que pue suponer p’Asturies). Otru de los protagonistes d’esta entrega nueva de Krasnia ye l’escritor libanés afincáu en París Amin Maalouf (Premiu Príncipe d’Asturies de les Lletres 2010), del que se publica una guía de llectura sobre les sos noveles (León l'Africanu, Samarcanda, El viaxe de Baldassare o La peña de Tanios) y ensayos (Identidaes asesines o Los desaxustes del mundu). «La revolución 3D» trata sobre la incidencia d’esta tecnoloxía na industria cinematográfica. Pela so parte, l’artículu «25 años de música rock en Asturias (1984-2009)» fai un repasu peles obres bibliográfiques que trataron el tema de la escena pop-rock asturiana nes últimes dos décades.

Ciárrase esti númberu 33 cola sección habitual de crítica de llibros y discos. El boletín Krasnia pue alcontrase en dellos locales y llibreríes de la ciudá de Xixón.