Cine, teatru y TV

TPA emite un programa nuevu n’asturianu

TPA refuerza'l so apueste pola programación n’asturianu col espaciu Mirasturies, el pasáu recién, que la cadena autonómica va emitir los llunes y los vienres a les 9:30 hores. El programa inclúi documentales sobre la historia, la naturaleza, el patrimoniu cultural, l’arte, la etnografía y el folclor del país.

La serie documental repasa a lo llargo de 50 capítulos la historia d’Asturies n’espisodios como «Asturies, crónica d’un sieglu» y «Tal como yéremos»; recuerre los espacios naturales y muestra la flora y la fauna n’«Árboles y viesques d’Asturies», «Fauna d’Asturies, de les cumes al monte» y «L’osu pardu», ente otros.

Mirasturies concede una atención especial al patrimoniu histórico-artísticu en «La puerta’l cielu», «El Románicu n’Asturies», «Catedral d’Uviéu» y «Arte Góticu»; y a la cultura popular y les tradiciones colos capítulos dedicaos a «Ferramientes tradicionales», «La forxa del metal» y los «Mercaos tradicionales».

El programa de TPA ufierta, tamién, un recorríu pel territoriu d’Asturies con «Cares, la garganta divina», «Un paséu per Uviéu» y «Les rutes de Les Xanes y del Navia». Tampoco falten la gastronomía y los deportes tradicionales como los bolos.