Sociedá

El festival Beltaine celebra la «Xuntanza Atlántica»

El grupu cornuallés Kekezza.

El domingu 25 de xunetu, a partir de les 19:30 hores, na Plaza’l Parche d’Avilés, va entamase la llamada Xuntanza Atlántica dientro de los actos del festival Beltaine. Nella los asistentes van poder disfrutar d’una muestra del folclor (música y baille) de delles de les delegaciones participantes nesti eventu que ta celebrando la so segunda edición. Concretamente les agrupaciones que van xubir al escenariu van ser Kekezza (Cornualles), Traspés (Galicia), Cercle Celtique Saint-Nazarie (Bretaña), St. Patricks Pipe Band (Irlanda), Pauliteiros (Portugal), Xuntanza (Asturies) y Trasgu (Asturies).

Enantes d'eso, el programa inclúi tamién la entrega de premios (Auditoriu de la Casa de la Cultura, 12:00 hores) del VII Concursu de la Canción Asturiana, pa siguir depués con un pasacáis.

Otra manera, tamién esi día, el Beltaine treslládase al conceyu vecín d’Illas, en concreto a la so capital, La Caizuela, pa ufiertar una muestra folclórica (13:00 hores) colos gallegos de Traspés y los cornualleses de Kekezza.