Música

Falanoncaduca actúa en Xixón

Falanoncaduca.

El grupu Falanoncaduca va actuar el domingu 25 de xunetu, a les 19:00 hores, na Prazuela Samiguel de Xixón, nun conciertu enmarcáu dientro’l ciclu cultural Arte na Cai. Nesta actuación van aprovechar p’adelantar dellos temes de Tiempu de povisa, el discu debú qu’esta formación entra a grabar el 16 d’agostu.

Formada nel 2007, Falanoncaduca ye una banda nacida de la unión de dellos músicos mozos de L.lena, Uviéu y Xixón. Autodefinen el so estilu como Mecigayu Son, una mestura de soníos que van del rock a los ritmos llatinos, ensin escaecer el ska o’l folk astur. Cola reivindicación siempre presente nes sos lletres, editaron nel 2009 la maqueta En llingua afilada y yá tienen pisao abondos escenarios de dientro y fuera d’Asturies.

Nesti conciertu xixonés van ufiertar bona parte del so repertoriu pa facer baillar y blincar a los ellí presentes. Amás, esta actuación val-yos p’adelantar temes de Tiempu de povisa, debú discográficu qu’edita’l sellu Algamar Producciones y que la formación va grabar nos estudios ACME d’Avilés.