Arte

María Jesús Rodríguez presenta la esposición «El Xardín de Mercedes»

Una obra de María Jesús Rodríguez.

La Sala d’Esposiciones del Complexu Cultural As Quintas d’A Caridá acueye la muestra El Xardín de Mercedes de María Jesús Rodríguez.

La propia artista diz que descubrió la belleza cuando, dende la capiya de San Lourenzo, vio aparecer de secute la playa de Penarronda. Esi llugar marcaríala fondamente’l restu de la so vida. A lo llargo de ventidós años fixo la so obra en cartón, de carácter sobriu, analíticu y esperimental, pero tamién metáfora del occidente asturianu. La memoria nun ye una escusa pa la obra, ye la so razón de ser, ensin agotala, porque nun resulta válida otra clas de llectura qu’inore esti datu de partida. Nel 2003 abandona’l cartón y principia a trabayar l’aluminiu.

Anguaño fotografía fragmentos de naturaleza colos que tien una rellación afectiva mui fuerte. A partir de la fotografía fai un dibuxu nel ordenador, depués pásalu al aluminiu, grábalu, píntalu con oleu y barnízalu. Nesta esposición tamién utiliza l’espeyu como soporte.