Sociedá

Escomiencen les xornaes gastronómiques «Meses Celtes»

Fabes con virigüetos.

Dende’l pasáu vienres 23 de xunetu tán desenvolviéndose en 24 restaurantes y sidreríes de la comarca d'Avilés el menú de la III Edición de les Xornaes Gastronómiques Meses Celtes, qu’organiza Turismu Comarca Avilés, cola collaboración de la Mesa de Turismu de la Unión de Comerciantes d’Avilés y Comarca (UCAYC).

Con esta iniciativa de la Mancomunidá Comarca d'Avilés quier promocionase ún de los recursos turísticos más importantes –la gastronomía–, vinculándolu a la fiesta del Beltaine Intercélticu d’Avilés. Fiesta’l Branu. El menú va ufiertase, a la xinta, los díes 29, 30 y 31 de xunetu, y ta compuestu d’ensalada de sardines con quesu de Comarca Avilés, fabes con virigüetos, bonitu de costera atlántica y, de postre, mazana caramelizao a la nuestra manera. Nes cenes de los díes de celebración de les xornaes gastronómiques, los restaurantes participantes van ufrir a los veceros un platu típicu de los distintos países celtes que visiten la comarca na celebración del Beltaine.

Esti proyectu vien a reforzar la proyección gastronómica de la comarca, y únese a otros eventos que se realicen a lo llargo del añu como los Menús d’Antroxu o la Selmana de la Tapa que se va celebrar el próximu mes de septiembre; o los Menús de Pasión y les Xornaes del Bacaláu, que complementen la Selmana Santa.