Llibros

La revista «La Sidra» llega al númberu 79

Un culín de sidra.

L’asociación Ensame Sidreru punxo na cai estos díes un númberu nuevu de la so revista La Sidra. Con él llega yá al volume 79. Dende hai yá dellos númberos aparez esta publicación con una paxinación más amplia y una diversificación nos temes que trata. La filosofia d’esta publicación ye la de recoyer, tratar y analizar too aquello que tenga dalgo que ver cola cultura sidrera, fundamentalmente asturiana, anque, de xemes en cuando, aparezan artículos d’otros llugares tamién productores d’esta bebida.

El númberu 79 yá ta disponible nos llugares onde se suel distribuír la revista. Nél destaquen un reportaxe estensu sobre’l Festival de la Sidra de Nava (onde’l llagar Trabanco foi escoyíu como’l meyor del añu n’Asturies); tamién se dedica un espaciu al V Festival de la Sidra de Llaviana (eventu qu’añu tres añu algama mayor importancia); les páxines centrales tienen como protagonista al actu de presentación de la DOP (Denominación d’Orixe Protexida) Sidra d’Asturies (que nesta ocasión acoyó unes Xornaes Gastronómiques de la Collecha DOP Sidra d’Asturies); el centenariu de Sidra Orizón o la visita a Asturies del llagareru alemán Schnneider son otros de los munchos asuntos rellacionaos col mundu de la sidra (o arreyaos a él) que trata esta publicación. Nes sos más de 100 páxines, esta publicación del Ensame Sidreru vien tamién coles sos secciones avezaes d’entrevistes, actualidá sidrera, axenda, crítica de llibros, etc.