Sociedá

Carlos Alba pon escuela de monólogu tradicional asturianu

Carlos Alba.

L'actor y periodista Carlos Alba, como tolos branos, va poner un taller en Candás p'aprender a escribir y interpretar monólogos. Les clases van ser ente'l 9 y el 13 d'agostu, n'horariu de 18 a 21 hores. La información sobre esta actividá y les inscripciones pueden facese nel Teatru Prendés de Candás o llamando al teléfonu 985 871 021. El taller va dase na Casa la Cultura de Candás y la matrícula cuesta 24 euros.

Más conocíu por Cellero, el nome del personaxe que creó, l’actor y humorista avilesín Carlos Alba trabaya na renovación del monólogu, un xéneru teatral mui enraigonáu n’Asturies y que tuvo perbonos cultivadores de gran popularidá como Pandiella. Anque tien en repertoriu testos d’autores clásicos como Marcos del Torniello o Pepín Quevedo, Cellero trai monólogos sobre asuntos d’actualidá trataos siempre cola retranca d’un vieyu coñón. Munchos d’ellos vieron la lluz axuntaos nel llibru Del chigre, publicáu pola editorial Trabe nel 2006. Otra manera, esti actor nun s’escaez de la busca d’una calidá escénica afitada nel trabayu actoral sobre’l personaxe, amás de l’actualización y esperimentación de contino con unos guiones que –xugando colos esterotipos– presenten problemes y contradicciones d’actualidá.

Na estaya didáctica, Carlos Alba pon talleres de Narración Oral (cuentacuentos nes aules) pa profesores y maestros na Fundación Madrid Formación y Empleo (MAFOREM) y de periodismu pa neños.