Música
El Concursu de Folk «Cuarto de los Valles» yá tien ganadores
Banda del Pepo.
El XI Concursu Internacional de Folk Cuarto de los Valles, que se celebró la fin de selmana pasada en Navelgas (Tinéu), acabó con premiu pa los tres grupos finalistes de la estaya de solistes, dúos y tríos. La calidá y estremada musicalidá de les actuaciones de Marcela Ferrari (Arxentina), Barrunto Bellota Band (Estremadura) y Iñaki Plaza & Ion Garmendía (Euskadi) fixo que les tres bandes foren reconocíes el vienres como ganadores. Yera la primer vez que dalgo asina socedía nesti certame yá veteranu.
El sábadu, el gallardón llevólu la Banda del Pepo, de Murcia, qu'impunxo'l so soníu mediterraneu énte'l grupu gallegu Pé de Boi y los catalanes Tazzuf. Pepo fixo un altu na so xira ente Exipto y Portugal pa tocar nel conceyu de Tinéu, lo que da una idea del prestixu que ta algamando'l festival, qu'esti añu contó con un xuráu formáu por Mario Correia, del Festival de Folk de Sendim (Portugal); Josean Martín, del Bidasoa Folk (Guipuzkoa); Miguel González, del Festival Internacional de Música de Vilanova i la Geltrú (Barcelona); Pablo García Rayo, del ciclu folk Los Viernes de La Tradición de San Sebastián de los Reyes (Madrid); el director de cine José Antonio Quirós; y el compositor Javier Palanca.
Los organizadores del Cuarto de los Valles esperen sacar los tres discos dedicaos a los tres últimos concursos, como yá fixeron coles ediciones anteriores, enantes de la fin del añu 2011.
