Arte
El Premiu Astragal da a conocer los proyectos ganadores
Espacio Astragal.
El llunes 26 de xunetu reunióse na VI Feria de Les Asociaciones de Xixón el xuráu del Premiu Astragal pa facer escoyeta ente los siete proyectos presentaos anguaño a concursu. Dolores Automáticos, del colectivu Bailarinas Parabólicas –que formen Mariate García y Mónica Cofiño–, y Re-yes (Rodando), de Francisco Caso, van tar espuestes nel Espaciu Astragal, del Conseyu de la Mocedá de Xixón, l'últimu trimestre del 2010 y el primeru del 2011. Precisamente, ún de los requisitos pa la presentación del proyectu yera adaptalu a esta sala d'esposiciones de Xixón, onde davezu pueden visitase instalaciones, videoinstalaciones, performances y otres manifestaciones del arte actual. Nel xuráu taben la nueva directora de la Fundación Municipal de Cultura, Pilar Lafita; la directora de Llaboral Centru d'Arte, Rosina Gómez-Baeza; la ganadora de la última edición, Cristina Ferrández Box; el críticu d'arte Jaime Luís Martín; y l'artista Maite Centol.
El premiu Astragal, que ta dientro del Programa Culturaquí, ta entamáu pola Conseyería de Cultura y Turismu a traviés del Institutu Asturianu de la Mocedá y el Conseyu de la Mocedá de Xixón. Ta dotáu con dos premios de 4.000 euros. El CMX acaba de firmar un conveniu de collaboración con Llaboral Centru d'Arte y Creación Industrial del que nació la primer coproducción pa conmemorar el décimu aniversariu d'esti certame, llamada Cabina.
