Cine, teatru y TV

«A ver la ballena» sigue coles sos actividaes

Interntet2.

El ciclu A ver la ballena, entamáu pola Autoridá Portuaria de Xixón, sigue coles sos actividaes, que se desenvuelven a lo llargo de los mesmes de branu. Asina, pal xueves 29 de xunetu, nos Xardinos de la Reina, va facese un taller y un conciertu.

El cuerpu como materia ye’l títulu del taller que va impartir Jordi Ferreiro, un artista visual espertu en dar formes nueves a la espresión artística. Nesti taller, presentáu la primer vez na edición pasada del Sónar Kids (la versión infantil del Sónar), invita a tola familia, dende los más pequeños a los mayores, a utilizar los sos propios cuerpos como ferramientes pa l’arte contemporaneu nuna especie de mini-gimkana enllena de xuegos y diversión.

Otra manera, Carles Carbonell va presentar el proyectu musical Internet2, col que yá actuó nel Centre Pompidou de París, festivales como Sónar o Cenremàtic o mesmamente nes fiestes de la revista NME n’Inglaterra. ¿Ye posible figurase una mezcla d’electrónica casera, pop barrocu y minimalismu de xuguete? ¿Ye posible mezclar a Wendy Carlos con Momus y la Companyia Elèctrica Dharma? Internet2 ye la respuesta.