Música

John Campbelljohn llega a les «Nueches del Palaciu»

John Campbelljohn.

El xueves 29 de xunetu, a les 22:30 hores, nel Palaciu Revillaxixéu (Xixón), dientro del ciclu Les Nueches del Palaciu, va actuar el guitarrista de Nueva Escocia (Canadá) John Campbelljohn. La entrada ye llibre y gratuíta hasta completar l’aforu.

Les sos influencies van dende Mississippi Fred McDowell y Son House a Duane Allman y Johnny Winter. Debuta en 1993 col discu How Does It Feel? pol que llogra los máximos premios que se conceden nel so país d’orixe: Meyor Artista Blues del Añu y Meyor Guitarrista del Añu. En 1995, col sellu NOOD Records, deleita al públicu con una colección de temes vieyos de blues titulada Under The Blue Covert; un homenaxe a la tradición con standars del calibre de «Baby Please Come Home» y «Key To The Highway». Nel 2002 graba Nerves of steel, el discu que «toos tendríemos que tener», según la revista Rolling Stone; con esti trabayu vuelve a ser reconocíu como’l meyor guitarrista del añu y tamién como’l meyor lletrista. Nel 2004 graba The World Is Crazy, una recopilación fecha nuna xira per Alemaña. Colos sos dos últimos trabayos, Hook Slide & Sinker y Weight Of The Word, foi reconocíu como Meyor Grabación del Añu y Meyor Conciertu Electrónicu de Canadá nel 2007. Dende 1996 fixo xires anuales per Canadá, Estaos Uníos, Xapón y Europa.

Amás de John Campbelljohn a la voz y la guitarra, nel conciertu van participar tamién Neil Robertson a la batería y Aubrey Grant Leslie al baxu.