Cine, teatru y TV

El Palaciu Revillaxixéu acueye un espectáculu de «clown-cabaré»

El vienres 30 de xunetu, a les 22:30 hores, nel Centru Cultural Cajastur Palaciu Revillaxixéu (Patiu Posterior) de Xixón, va ufiertase la obra titulada Aarrgghhff!!! a cargu d’Eugenia Manzanera.

Trátase d’un espectáculu de clown-cabaré en llingua gramelot con Eugenia Manzanera n’escena, encargada tamién de la dirección y la dramaturxa. Gramelot ye un términu d’orixe francés, acuñáu polo cómicos del arte a finales del sieglu XVI, que significa «xuegu onomatopéyicu capaz de tresmitir con ayuda de xestos, ritmos y sonoridaes particulares un discursu completu». N’Aarrgghhff!!! Eugenia Manzanera «La Paya-Sasa», nun fala nengún idioma conocíu nesti planeta pero utilízalos toos. Emplega los sos soníos, les sos cadencies, les sos sensualidaes y tonalidaes pa crear una pieza poética-grotesca-delirante y allocada. Rescata la musicalidá y l’espíritu de cada idioma pa construir un gramelot del sieglu XXI. Aarrgghhff!!! ye un glayíu primitivu, un bramíu rotundu que remite a pasiones ensin palabres. Y esi glayíu surde curtiu y intensu, llargu y fondu… Munches veces ye un glayíu consciente y otres pura sorpresa, poero siempre glayíu sinceru y xabaz que se tresforma en ruxíu de belleza y pasión.